Russiýanyň uniwersitetlerinde okuw tölegleri bir ýylyň dowamynda ortaça 10,7% ýokarlandy. Bu barada Russiýanyň Ylym we ýokary bilim ministrliginiň maglumatlaryna salgylanyp, «Kommersant» gazeti habar berýär.
Bahalaryň ösmeginde iň ýokary görkezijiniň biri MIFI Milli ýadro gözleg uniwersitetinde hasaba alyndy, bu ýerde okuwyň ortaça bahasy 32,2% ýokarlandy. Deňeşdirmek üçin, bu görkeziji 2024-nji ýylda 6,6%-e, 2025-nji ýylda bolsa 15,6%-e barabardy.
Kabul ediş toparynyň jogapkär sekretarynyň orunbasary Alekseý Ýegorow bahalaryň ýokarlanmagyny ýadro fizikasy boýunça bilim maksatnamalarynyň gymmatlamagy bilen düşündirdi. Maglumat tehnologiýalary bilen baglanyşykly ugurlarda bolsa bahanyň ösüşi ep-esli pes boldy.
Russiýanyň Halk hojalygy we döwlet gullugy akademiýasynda okuwyň ortaça bahasy 12,7% ýokarlandy, şol bir wagtda tölegli ýerleriň sany 21,8% azaldyldy. Düzgünleşdirilýän ugurlarda bahalar 12,6% galdy. Iň uly ýokarlanma «Biznes dolandyryş» we «Taslamalary dolandyryş» maksatnamalarynda bellenilip, ol ýerde okuw tölegi 25% gymmatlady.
Bahalaryň ýokarlanmagy sebitlerdäki ýokary okuw mekdeplerinde hem ýüze çykdy. Kuban döwlet uniwersitetinde ähli bilim maksatnamalarynyň bahasy galdy, iň uly ösüş bolsa «Hukuk öwreniş» ugruna degişli bolup, baha 33% ýokarlandy. Korolýow adyndaky Samara uniwersitetinde ortaça ösüş 15%-e, aýratyn hünärlerde bolsa 22%-e ýetdi. Nowosibirsk döwlet tehniki uniwersitetinde okuw tölegleri, takmynan, 14% ýokarlandy.
Şeýle-de, Ylym we ýokary bilim ministrligi taýýarlyk ugurlarynyň 40-ysy boýunça tölegli ýerleriň sanyny 47 müň birlik azaltmagy meýilleşdirýär. Ministrlik munuň sebäbini öň uniwersitetleriň tölegli esasda çäksiz diýen ýaly talyp kabul edip bilendigi bilen düşündirýär. Iň uly azaltma geljekki hukukçylaryň (17,9%), dolandyryjylaryň (17,1%) we ykdysatçylaryň (15,6%) ýerlerine degişlidir. Bu hünärler boýunça okuwyň bahasy 10,9% ýokarlandy, bu bolsa ýurt boýunça ortaça görkezijä ýakyndyr.
