ABŞ-nyň Raýatlyk we immigrasiýa gullugy (USCIS) grin-kart almak üçin arza tabşyrmagyň tertibini üýtgetdi: indi daşary ýurt raýatlary resminamalaryna seredilýän döwri ýurduň çäginden çykyp gitmelidir.
USCIS gullugynyň habar bermegine görä, bu täze düzgünler immigrasion bolmadyk wizalaryň eýelerine — talyplara, syýahatçylara we wagtlaýyn işgärlere degişlidir. Edara şeýle wizalaryň immigrasiýanyň ilkinji tapgyry hökmünde ulanylmaly däldigini belleýär.
Gullugyň metbugat sekretary Zak Kaler ABŞ-nyň çäginden daşary konsullyklaryň üsti bilen resminamalary resmileşdirmegiň täze tertibiniň, raýatlara grin-kart statusyny bermekden ýüz öwrülen ýagdaýynda, olaryň ýurtda bikanun galmak ýagdaýlarynyň sanyny azaltmaga mümkinçilik berjekdigini nygtady. Onuň aýtmagyna görä, bu çäre USCIS-iň serişdelerini beýleki wajyp ugurlara, şol sanda raýatlyga kabul etmek işlerine, zorlugyň hem-de adam söwdasynyň pidalarynyň arzalaryna gönükdirmäge ýardam eder.
USCIS-iň öňki işgäri Dug Rend bu täze syýasaty tankyt etdi. Ol her ýylda, takmynan, bir million adamyň grin-kart almak üçin resminama tabşyrýandygyny, şol bir wagtyň özünde arza berijileriň, takmynan, ýarysynyň ýurtdan çykman öz statusyny üýtgedýändigini mälim etdi.
«CNN» telekanalynyň berýän maglumatyna görä, bu özgertmeler kanuny migrantlaryň köpüsine öz täsirini ýetirer. Telekanal resminamalary barlamak we taýýarlamak işleriniň dowam edýän wagty adamlaryň ABŞ-ny birnäçe aýlap, hatda ýyllap terk etmeli bolmagynyň mümkindigini habar berýär.
Şeýle hem bu täze düzgünler ABŞ-nyň birnäçe syýasatçylary tarapyndan nägilelik döretdi. Olar bu çözgüdiň migrantlaryň maşgalasyna we ýurduň ýokary hünärli hünärmenler bazaryna ýetirip biljek zyýanly taraplary barada duýdurýar.
