Lionsgate kinostudiýasy baş keşpleri Jonni Deppiň we Penelopa Krusyň ýerine ýetirmeginde ýiti sýužetli «Day Drinker» (Пьяница / Serhoş) triller filminiň premýera senesini 2027-nji ýylyň 26-njy martyna belledi. Bu barada «Deadline» neşiri habar berýär.
Aslynda şol gün Mel Gibsonyň «Isanyň hyrujy: Direliş» (Страсти Христовы: Воскресение) filminiň birinji böleginiň ekrana çykmagy meýilleşdirilipdi, ýöne studiýa ony 2027-nji ýylyň maý aýyna süýşürdi, ikinji bölegini bolsa 2028-nji ýylyň maýyna geçirdi.
Garaşylýan bu täze film Jonni Deppiň öňki aýaly Ember Hýord bilen bolan kazyýet işinden soň, uly býujetli Holliwud kinematografiýasyna ilkinji gezek gaýdyp gelmegi bolar. Şol kazyýet galmagalyndan soň, Disney kompaniýasy we beýleki uly studiýalar aktýor bilen şertnamalaryny ýatyrypdy. Aktýoryň öň amerikan kinosyna gaýdyp gelmek ähtimallygynyň örän pesdigi barada aýdan sözlerine garamazdan, ol bu taslama gatnaşmaga razy boldy.
Bu taslama Jonni Depp bilen Penelopa Krusyň bilelikdäki dördünji işidir. Filmdäki ýene bir esasy keşbi Medelin Klaýn ýerine ýetirdi.
Kinofilmiň sýužeti hususy gämidäki barmen gyzyň wakasyna esaslanýar. Ol ýerde gyz syrly bir myhman bilen tanyşýar. Soňra gahrymanlar täsirli jenaýatçy aýalyň gatnaşmagynda jenaýat dünýäsine çekilýär we özara garaşylmadyk bir baglanyşygyň bardygyny ýüze çykarýar.
Taslamanyň režissýory hökmünde «Tomsuň 500 güni» (500 дней лета) we «Täze Möý adam» (Новый Человек-паук) filmleri bilen tanalýan Mark Web çykyş etdi. Ssenarini «Geljegiň urşy» (Война будущего) filminiň awtory Zak Din taýýarlady, filmiň prodýuserleri bolsa «Jon Wik» franşizasyny ösdürmek bilen meşgullanan Bezil Iwanik we Erika Lidir.
