Benksiniň «Tapylan peýzaždaky gyzjagaz we şar» (2012) atly eseri ýapyk görnüşde geçirilen auksionda 17,94 million dollara satyldy. «The Wall Street Journal» neşiriniň habar bermegine görä, bu söwda bäsleşigi 20-nji maýda Nýu-Ýorkuň Tiffany & Co dükanynda Fair Warning kompaniýasy tarapyndan guraldy.
Bu eser ak we gara reňklerde ýerine ýetirilen bolup, ondaky ýeke-täk ýiti reňkli şekil — ýürek şekilli gyzyl şardyr. Sungat hünärmenleri bu eseriň bahasyny 13–18 million dollar aralygynda çaklapdy. Netijede, ony çaklanylan iň ýokary baha golaý bahadan satmak başartdy. Indi bu surat Benksiniň häzire çenli auksionlarda satylan iň gymmat üçünji eseri boldy. Söwda bäsleşigine ýörite çagyrylan 70-e golaý myhman gatnaşdy. Suraty satyn alan adam öz bahasyny telefon arkaly hödürledi we onuň ady aýan edilmeýär.
Suratkeşiň iň meşhur eserleriniň biri 2018-nji ýylda Londonyň Sotheby’s auksionynda 1,042 million funt sterlinge satylan «Şarly gyzjagaz» suratynyň aýratyn nusgasy bolup galýar. Söwda tamamlanan badyna suratyň çarçuwasyna ýerleşdirilen ýörite şreder eseri bölekleýin ýok etmäge başlady.
Bu wakadan soň, eser täze — «Zibil bedresindäki söýgi» diýen ady aldy we soňra şol ýyrtylan görnüşinde 18 million funt sterlinge (satylan wagtyň hümmeti boýunça takmynan, 25,4 million dollar) gaýtadan satyldy. Şol ýylyň martynda bolsa «Painting for Saints» (ýa-da «Game Changer» — «Oýun üýtgediji») atly suraty 22,45 million dollara satyldy.
Bu gezekki auksion Reuters habarlar agentliginiň awtoryň hakyky şahsyýeti barada çap eden makalasyndan soňra geçirilen ilkinji söwdadyr. Agentligiň tassyklamagyna görä, Benksi – bu Bristol şäherinden bolan Robin Ganningem bolup, ol soň Dewid Jons adyny aldy. Suratkeşiň bähbitlerini goraýan Pest Control Office kompaniýasy bolsa bu maglumatlar barada teswir bermekden ýüz öwürdi.
