«Mançester Ýunaýted» kluby Maýkl Kerrigiň toparyň baş tälimçisi wezipesine gutarnykly bellenilendigini resmi taýdan yglan etdi. Ol mundan ozal bu wezipäni wagtlaýyn ýerine ýetiriji hökmünde alyp barýardy.
KHBS-iň maglumatyna görä, taraplaryň arasynda gol çekilen täze şertnama 2028-nji ýyla çenli hereket eder.
«Men mundan 20 ýyl ozal bu ýere ilkinji gezek gelen günümden bäri «Mançester Ýunaýtediň» jadysyny duýýaryn. Biziň bu aýratyn futbol klubumyza ýolbaşçylyk etmek jogapkärçiligi meni örän buýsandyrýar. Geçen bäş aýyň dowamynda bu futbolçylar topary biziň şu ýerde talap edýän durnuklylyk, agzybirlik we maksada okgunlylyk ýaly ýokary standartlarymyza doly laýyk gelip biljekdigini görkezdi.
Indi bolsa bilelikde, uly maksatlar we aýdyň meýilnamalar bilen öňe hereket etmegiň wagty geldi. «Mançester Ýunaýted» we biziň ajaýyp janköýerlerimiz iň abraýly kuboklar ugrunda gaýtadan bäsleşmäge doly mynasypdyr» – diýip, Kerrik özüniň wezipä bellenilmegine teswir berdi. Onuň sözlerini klubuň resmi saýty getirýär.
Kerrik 13-nji ýanwarda Ruben Amorim wezipeden gidenden soň «Mançester Ýunaýtediň» başyna geçdi. Onuň baş tälimçi rolundaky ilkinji zähmet şertnamasy 2026-njy ýylyň tomsuna çenli niýetlenipdi. 44 ýaşly hünärmeniň ýolbaşçylygynda topar Angliýanyň çempionatynda geçiren 15 oýnunda 10 ýeňiş gazandy we geljekki möwsüm üçin Çempionlar ligasyna gatnaşmak hukugyny kepillendirdi.
