Toyota kompaniýasy ABŞ-da 3,5 litrlik V6 hereketlendirijileriniň döwülmek howpy sebäpli 44 müň töweregi Toyota Tundra pikapyny yzyna çagyrýandygyny yglan etdi.
Öndürijiniň maglumatlaryna görä, detallary gaýtadan işlemek prosesinden soň hereketlendirijilerde mehaniki galyndylar galyp bilýär, bu bolsa podşipnikleriň zaýalanmagyna we hereketlendirijiniň gysylmagyna sebäp bolup biler. Bu şol bir mesele bilen baglanyşykly eýýäm üçünji serwis kampaniýasydyr.
Ozal bu ýagdaý diňe «Toyota Tundra» däl, eýsem 2021-nji ýyldan 2024-nji ýylyň başyna çenli çykarylan şol meňzeş hereketlendirijili «Lexus» kysymly ulaglary hem öz içine alýardy. Täze kampaniýa bolsa 2024-nji ýylyň dowamynda öndürilen awtoulaglara degişlidir.
Toyota kompaniýasy mesele ýüze çykarylandan soň, hereketlendirijileri arassalamak üçin goşmaça gözegçilik çäreleriniň girizilendigini habar berdi. Ýöne şonda-da soňra galan metal galyndylarynyň käbir berkitmeleri hatardan çykarmak üçin ýeterlikdigi mälim boldy.
2024-nji ýyldan soň çykarylan awtoulaglara has berkidilen podşipnikler goýuldy. Kompaniýada olaryň şeýle zeper ýetmelerden has gowy goralandygyna ynanýarlar.
Toyota hereketlendirijileri abatlamagyň gutarnykly usulynyň entek işlenip düzülýändigini mälim etdi. Gutarnykly çözgüdi birnäçe aýyň dowamynda tapmak meýilleşdirilýär. Kompaniýanyň maglumatyna görä, öňki yzyna çagyryş kampaniýalaryndan 77 müňden gowrak awtoulag eýýäm abatlaýyşdan geçdi.
Bu mesele gibrid güýç gurluşly pikaplara we ýolsuz ýerlerde ýöreýän ulaglara (wnedorožnik) täsir etmeýär.
