Dünýäniň dürli ýurtlarynyň futbolçylary Halkara futbol federasiýasyna (FIFA) açyk hat ýollap, ABŞ-da, Kanadada we Meksikada geçiriljek 2026-njy ýylyň Dünýä çempionatynda oýunçylary aşa yssy howadan goramak çärelerini güýçlendirmäge çagyrdylar.
Ýigrimiden gowrak ýurduň ýygyndy we klub wekilleri (häzirki hem-de öňki meşhur oýunçylar) bu haty goldadylar. Olar hem aşa yssy baş aýlanmagy, güýçli ýadawlygy we myşsa guruşmasyny döredip bilýär, şonuň netijesinde bolsa, futbolçylaryň fiziki ukyby peselip, saglygyna uly howp abanýar diýip hasap edýärler.
Futbolçylar FIFA-nyň lukmanlaryň maslahatyndan ugur alyp, ýaryş başlanmanka yssylyk stressine garşy düzgünlerine täzeden seretmegini isleýärler. Bu ýüzlenme World Weather Attribution guramasynyň oýun wagtynda örän yssy howanyň bolup biljekdigi baradaky duýduryşyndan soň peýda boldy.
FIFA hem öz gezeginde oýunlarda boljak howa şertleri hakynda alada edilýändigini we stadionlar hem-de guramaçy şäherler bilen bilelikde şu aşakdaky çäreleriň görüljekdigini mälim etdi:
Howanyň gyzgynlygyna garamazdan, her ýarymda oýunçylara suw içmek üçin hökmany suratda 3 minutlyk arakesme berler.
Toparlar oýnuň dowamynda 5 sany oýunçyny çalşyp bilerler, goşmaça wagtda ýene bir çalşyga rugsat berler, şeýle-de oýunçynyň beýnisiniň sarsan ýagdaýynda aýratyn ýene bir gezek çalşyk edip bolar.
Üsti açyk stadionlarda futbolçylaryň oturýan ýerlerinde howany sowadýan ýörite mikroklimat enjamlary gurnalar.
Käbir oýunlar üsti ýapyk arenalara ýa-da günüň has salkyn böleginde geçiriler.
Dünýä çempionatynda 5 sany oýnuň 28 °C töweregi yssylykda geçirilmegine garaşylýar. Halkara professional futbolçylar assosiasiýasy (FIFPRO) bolsa bu gyzgynlygy oýun oynamak üçin howply hasaplaýar.
Ýagdaýlardan görnüşi ýaly, 2026-njy ýylyň Dünýä çempionaty diňe bir güýçli bäsdeşlik däl, eýsem aşa yssy howa garşy hem uly synag bolar. Şoňa görä, futbolçylar öz saglyklaryny goramak üçin FIFA-dan has gowy şertleri çäreleri talap edýärler.
