Arheologlar Meksikanyň jeňňelliklerinde tapylan ýeriň maýýalaryň ýitip giden Sak-Balam şäheri bolup biljekdigine degişli täze subutnamalary hödürledi. Bu ýeriň ispan basybalyjygyndan soňra garşylyk görkezilen iň soňky merkezleriň birine öwrülendigi çaklanylýar diýip, «BBC Science Focus» neşiri ýazýar.
Gözlegleriň netijeleri barada Amerikan arheologiýa jemgyýetiniň duşuşygynda habar berildi. Bu işe Ýaponiýanyň Rissýo uniwersitetiniň doktory Ýuko Siratori ýolbaşçylyk etdi. Onuň aýtmagyna görä, taryhy resminamalar 1694-nji ýylda bu ilatly nokatda 100-den gowrak öýüň bolandygyna şaýatlyk edýär.
Sak-Balam (ady «ak ýaguar» diýmegi aňladýar) ispanlar tarapyndan lakandon-çoli halkynyň Lakam-Tun paýtagt şäheri tozdurylandan soň, bu halk tarapyndan 1586-njy ýylda esaslandyrylypdyr. Bu ilatly nokat bir asyrdan gowrak wagt hereket edip, 1695-nji ýylda özüniň bar bolmagyny bütinleý bes edipdir.
Arheologlar bu şäheriň barlygyny görkezýän esasy subutnamalaryň biri hökmünde tapylan uzynlygy 16 metre, beýikligi bolsa, takmynan, bir metre barabar bolan diwary hasaplaýar. Gözlegçileriň aýtmagyna görä, onuň ölçegleri ispan resminamalarynda şäheriň jemgyýetçilik desgalary barada berilýän maglumatlar bilen gabat gelýär.
Şeýle hem gazuw-agtaryş işleriniň geçirilen ýerinde keramiki bölekler we maýmynyň şekiljigi tapyldy.
Alymlar tapylan diwaryň binanyň düýbi bilen baglanyşyklydygyny anyklamak üçin gözlegleri dowam etdirmekçi bolýar. Şäheriň tapylmagyna goşmaça taryhy tassyklama hökmünde kül gatlagy hem hyzmat edip biler, sebäbi taryhy çeşmelere görä, Sak-Balam şäheri basyp alnan wagty ýakylypdyr.
