Günbatar Gazagystan welaýatynyň Žalpaktal obasynda Eýfel diňiniň 30 metrlik göçürme nusgasy gurlar. Bu taslamany öňe sürenler ýerli mekdebiň uçurymlary boldy, olar okuwy tamamlamagynyň ýubileý senesine bagyşlap, ony oba sowgat etmegi ýüregine düwdi.
«KTK» telekanalynyň habar bermegine görä, obada eýýäm on ýyldan gowrak wagtdan bäri bir däp dowam edip gelýär: mekdebi tamamlamagynyň ýubileý senesini belleýän uçurymlar 25-nji maý mynasybetli oba üçin jemgyýetçilik taslamasyny durmuşa geçirýär. Häzire çenli Žalpaktalda seýilgähler, çagalar meýdançalary, heýkeller we suw çüwdürimi peýda boldy.
Bu gezek bolsa uçurymlar Eýfel diňiniň göçürme nusgasyny gurmagy makul bildi. Telekanalyň maglumatlaryna görä, desganyň beýikligi 30 metre barabar bolar.
Bu taslama sosial torlarda işjeň gürrüňlere sebäp boldy.
«Pikirler, elbetde, dürli-dürli boldy. Sosial torlaryň käbir ulanyjylary welaýat merkezinden 300 kilometr uzaklykda ýerleşýän çetki obanyň has peýdaly taslamalara mätäçdigini aýdýar. Mysal üçin, ýollaryň abatlanmagyna. Beýlekiler bolsa, eger bu diň bolmasa, oba barada bütin Gazagystanda gürlenmeginiň gaty gümanadygyny belleýär» – diýip, telekanal nygtady.
