Berkli-Haýts şäherçesindäki (Nýu-Jersi ştaty) Şerman-awenýu köçesiniň bir bölegine wagtlaýyn «Lionel Messi ýoly» ady berildi. Ýerli häkimiýetleriň aýtmagyna görä, bu köçäniň adynyň hemişelik üýtgedilmegi bolman, diňe simwolik häsiýetli çäredir.
Köçäniň adyny görkezýän ýazgyly tagtajyk eýýäm goýuldy. Bu başlangyç bilen Berkli-Haýts häkimliginiň ýanyndaky «Mundial — 2026 işçi topary» çykyş etdi. Komitetiň düzümine häkimligiň, okuw mekdepleriniň, sport guramalarynyň wekilleri we telekeçiler girdi. Maksat — geljek aýda ABŞ-da, Kanadada we Meksikada badalga aljak ýaryşyň öňüsyrasynda baýramçylyk gurşawyny döretmekden ybarat.
Ýazgyly tagtajyk argentina stilindäki kafeniň golaýynda, dünýä çempionatyna bagyşlanan tematiki graffitiniň açylmagy bilen bir wagtda peýda boldy. Berkli-Haýts şäherçesi 19-njy iýulda Dünýä kubogy — 2026-nyň final oýny geçiriljek «Metlaýf» stadionyndan, takmynan, 40 kilometr uzaklykda ýerleşýär.
Şäheriň häkimi Enji Dewani dünýä çempionatynyň adamlary sport we umumy hyjuw arkaly birleşdirýän global wakadygyny belledi.
