Habi Alonso 1-nji iýuldan başlap Londonyň «Çelsi» futbol klubunyň baş tälimçisi bolar. Klubuň metbugat gullugy ispaniýaly hünärmen bilen dörtýyllyk şertnama baglaşylandygyny resmi taýdan yglan etdi.
«“Çelsi” — dünýä futbolynyň iň uly klublarynyň biri, şonuň üçin bu beýik klubuň tälimçisi bolmak maňa uly buýsanç getirýär. Klubuň eýeleri we sport ýolbaşçylary bilen geçiren gürrüňdeşligimizden soň, biziň maksatlarymyzyň birdigi aýdyň boldy. Biz iň ýokary derejede durnukly çykyş etmäge we kuboklar ugrunda göreşmäge ukyply topary döretmek isleýäris. Toparda zehinli oýunçylar köp we klubuň mümkinçilikleri örän uly, oňa ýolbaşçylyk etmek meniň üçin uly mertebe bolar» — diýip, Alonso aýtdy.
Mundan öň 44 ýaşly tälimçi Lewerkuzeniň «Baýerine» ýolbaşçylyk edipdi we topar bilen ilkinji gezek möwsümi ýeňlişsiz tamamlap, Germaniýanyň çempiony boldy, şeýle hem ýurduň Kubogyny we Superkubogyny gazandy. Geçen ýylyň maý aýynda ol Madridiň «Real» toparyna baş tälimçi bolup geçdi we şu ýylyň 12-nji ýanwarynda ol ýerdäki wezipesinden boşadyldy.
Häzirki wagtda «Çelsiniň» baş tälimçisiniň wezipesini wagtlaýyn iňlis Каlum Makfarleýn ýerine ýetirýär. London kluby häzirki möwsümiň gidişinde italýan Enso Mareskany (1-nji ýanwar) we iňlis Liam Rosenýory (22-nji aprel) wezipeden aýyrdy.
