Germaniýanyň BMW awtokonserniniň baş direktory Oliwer Sipse wezipesinden gitdi. Ol bu wezipäni 2019-njy ýyldan bäri eýeläp gelýärdi. Bu barada awtoöndürijiniň metbugat relizinde habar berilýär.
Sipse kompaniýada 35 ýyl işledi. Onuň wezipeden gitmegi bolsa öňünden meýilleşdirilipdi. Ýolbaşçylygyň çalşyljakdygy barada kompaniýa 2025-nji ýylyň ahyrynda habar berdi.
Sipseniň ornuna kompaniýanyň içinde 1993-nji ýyldan bäri işläp gelýän Milan Nedelkowiç geçdi. Onuň bilen baglaşylan şertnama 2031-nji ýyla çenli hereket eder. Ozal Nedelkowiç Oksforddaky, Leýpsigdäki we Mýunhendäki zawodlarda hem ýolbaşçy wezipelerini, şeýle-de korporatiw hil bölüminiň ýolbaşçysy wezipesini eýeläpdi.
BMW-niň paýdarlarynyň ýyllyk ýygnagynda gözegçilik geňeşiniň başlygy Nikolas Peter Sipseniň dünýädäki çökgünliklere garamazdan, kompaniýany strategik taýdan dogry ýolda saklamagy başarandygyny belledi. Kompaniýa pandemiýa, ýarymgeçirijileriň ýetmezçiligine we awtomobil pudagyndaky ägirt uly özgerişlere garamazdan, girdejililigini saklady.
