Google kompaniýasy Android Auto awtomobil hyzmatlarynyň we Google-yň gurnalan awtomobil platformasynyň uly göwrümli täzelenmesini tanyşdyrdy. Täze funksiýalar 2026-njy ýylyň dowamynda laýyk gelýän awtomobillerde kem-kemden peýda bolup başlar.
Android Auto ulgamy "Material 3" dizaýn konsepsiýasyna geçer. Täzelenme täze şriftleri, has ýumşak animasiýalary we interaktiw widžetleri öz içine alýar. Şeýle hem interfeýsiň dürli formatly displeýlere, şol sanda aşa giň we tegelek ekranlara uýgunlaşdyrylmagy kämilleşdirildi.
Google Maps kartasynda binalaryň we ýeriň gurluşynyň üç ölçegli modellerini görkezýän immersiw režim peýda bolar. Gurnalan Google ulgamy bolan awtomobillerde bolsa, öňdäki kameralaryň kömegi bilen ýol çyzyklaryny seljerýän we hakyky wagt režiminde dogry zolga gönükdirýän "Live Lane Guidance" funksiýasy elýeterli bolar.
Multimediýa täzelikleriniň arasynda awtomobil duran ýerinde ýa-da zarýad alýarka sekuntda 60 kadr ýygylygy bolan Full HD wideo goldawy bar. Bu funksiýa BMW, Ford, Hyundai, Kia, Mercedes-Benz, Renault, Skoda we Volvo ýaly markalaryň modellerinde peýda bolar. Awtomobil hereket edip başlanda ulgam wideony awtomatiki usulda diňe ses režimine geçirer. Şeýle hem Dolby Atmos giňişlik ses goldawy yglan edildi.
Gemini emeli aň kömekçisi awtomatiki jogaplary we nawigasiýa talaplaryny döretmek üçin hatlary hem-de senenamany seljerip biler. Gurnalan Google platformasy bolan awtomobillerde bolsa emeli aň dolandyryş paneliniň signallaryny düşündirip we ulag baradaky tehniki soraglara jogap berip biler. Mundan başga-da, ulgamda wideokonferensiýalar üçin niýetlenen programmalar, şol sanda Zoom peýda bolar.
