Felisiti Jons «On bir ýitirilen gün» (Одиннадцать пропущенных дней») diýlip atlandyrylýan täze detektiw filminde Agata Kristiniň keşbini janlandyrar. Bu film ýazyjynyň 1926-njy ýyldaky syrly ýitirim bolşuna bagyşlanar diýip, Deadline neşiri habar berdi.
Kinotaslama 1926-njy ýylyň dekabrynda bolup geçen waka esaslanýar. Şol wagt meşhurlygynyň iň ýokary derejesine ýeten ýazyjy 11 günläp dereksiz ýitip, uly gözleg işleriniň sebäbine öwrülipdi. Jemgyýetde güýçli seslenme döreden bu wakany derňemäge döwrüň öňdebaryjy syýasatçylary we ýazyjylary, şol sanda Artur Konan Doýl hem gatnaşypdy.
Soňra Kristi myhmanhanalaryň birinden tapylýar. Ýöne ol şol ýere nähili barandygyny ýatlap bilmeýär. Ýitmegiň sebäpleri häzirki güne çenli jedelli mesele bolup galýar. Olaryň arasynda awtoulag heläkçiliginden soňky huşuny ýitirme, şeýle hem psihologik şikes ýa-da depressiýa sebäpli ýüze çykýan «psihofuga» (huşuň üýtgeme ýagdaýy) ýaly çaklamalar bar.
Filmde Wensan Kassel hem surata düşer. Ol işden çykan belgiýaly polisiýa detektiwiniň keşbini janlandyrar (bu keşp meşhur Erkýul Puarony ýatladýar). Aktýorlar düzümine Nikol Elizabet Berger we Oliwer Trewena hem girdiler.
Filmiň režissýory Berti Ellwud bolar. Ssenariýany Ernesto Foronda ýazyjynyň döredijiligini öwreniji Jared Keýdiň «Agata Kristi we on bir ýitirilen gün» atly kitabynyň esasynda ýazdy. Surata düşüriş işleriniň tomus paslynda Beýik Britaniýada başlanmagy meýilleşdirilýär.
