NASA 500-den 1800 kilometr aralygyndaky belentliklere 51 600 sany hemrany uçurmagy göz öňünde tutýan Blue Origin kompaniýasynyň «Sunrise» taslamasyna garşy ABŞ-nyň Federal aragatnaşyk komissiýasyna närazlyk hatyny iberdi.
Jeff Bezosa degişli bolan kompaniýanyň taslamasy maglumatlary işlemek merkezlerini ýerleşdirmek üçin orbita düzümini döretmegi meýilleşdirýär. Blue Origin munuň hasaplama çykdajylaryny azalmagyna kömek etjekdigini aýdýar. Emma, muňa garamazdan, NASA bu taslamany älem gurşawy we adamly uçuşlar üçin çynlakaý howp hasaplaýar.
FCC-ä ýollan ýüzlenmesinde agentlik meýilleşdirilýän orbitalaryň adamly missiýalaryň ýollary we ylmy obýektleriň traýektoriýalary bilen kesişýändigini görkezdi. Aýratyn hem, hemralaryň iş möhleti gutarandan soň, olary orbitadan çykarmagyň takyk usullarynyň ýoklugy uly biynjalyklyk döretdi. NASA-nyň pikiriçe, bu ýagdaý kosmos galyndylarynyň möçberiniň artmagyna getirip biler.
Şeýle hem edara Blue Origin-iň uçuş bazarynyň mümkinçilikleri we hemra toparynyň ýerleşdiriliş ölçegleri baradaky hasaplamalaryny tankytlady. Deňeşdirmek üçin NASA, mundan ozal SpaceX kompaniýasynyň töwekgelçilikleri azaltmak maksady bilen 9300-den gowrak «Starlink» hemrasynyň orbitasyny 500 kilometrden aşak düşürmäge razy bolandygyny ýatlatdy.
Gyzykly ýeri, öň Jeff Bezosyň Amazon kompaniýasyna degişli bolan «Amazon Leo» bölümi SpaceX-iň hemra taslamalaryny «peýdakeşlik» we «amala aşyrylmasyz» diýip tankytlapdy. Indi bolsa Blue Origin-iň özi şuna meňzeş aýplamalar bilen ýüzbe-ýüz boldy.
Şol bir wagtyň özünde, NASA kompaniýanyň hemralaryň astronom gözleglere ýetirýän täsirini azaltmak boýunça çäreleri göz öňünde tutandygyny belledi. Agentlik taslamany kämilleşdirmek üçin Blue Origin bilen hyzmatdaşlyk etmäge taýýardygyny mälim etdi.
Arza boýunça gutarnykly çözgüdi FCC kabul etmeli bolar.
