Italiýaly režissýorlar Juzeppe Stazi we Jankarlo Fontana nusgawy «Birwagtlar Amerikada» («Однажды в Америке») kinofilminiň döredilişi barada täze film düşürerler. Bu barada Variety neşiri habar berdi.
Taslamany Leone Film Group kompaniýasy hödürlär. Film režissýor Serjo Leoneniň 1984-nji ýylda Kann kinofestiwalynda ilkinji görkezilişi bolan gangster epopeýasynyň üstünde alyp baran işleri barada gürrüň berer.
Režissýoryň gyzy Raffaella Leone: «Aslynda, bu bütin ömrüni öz arzuwynyň yzyndan ylgap geçiren, ýa-da iň bolmanda, bir filmi döretmek üçin 15 ýylyny sarp eden we maksadyna ýetýänçä başga hiç zat bilen meşgullanmadyk adamyň hekaýatydyr. Özi-de onda meniň kakam hakynda teýeneli gürrüň berilýär» diýip, täze taslama barada öz garaýşyny beýan etdi.
Ssenariýany Juzeppe Stazi, Jankarlo Fontana, Ludowika Rampoldi we Dawide Serino ýazýarlar. Olar mundan ozal Prime Video üçin «Ýaramaz oglan» («Плохой парень») seriýasynyň üstünde işläpdiler.
Geljekki filmiň mazmuny entek doly mälim edilmedi. Ýöne wakalaryň Rimde, Nýu-Ýorkda, Los-Anjelesde, Parižde we Kannda bolup geçjekdigi belli. Kinofilm Serjo Leoneniň ömrüniň dürli döwürlerini, şol sanda çagalyk ýyllaryny hem öz içine alar.
