Režissýor Jeýms Kemeronyň hem aýdymçy Billi Aýlişiň bilelikdäki taslamasy – aýdymçynyň Mançesterdäki «Hit Me Hard and Soft: The Tour» atly konsertli syýahatyna bagyşlanan 3D-filmi dünýä prokatyna çykdy.
Paramount Pictures studiýasynyň goldawy bilen taýýarlanylan dokumental taslamanyň önümçiligi 2025-nji ýylda başlandy. Bu barada aýdymçy konsertleriniň dowamynda janköýerlerine habar beripdi.
Kemeron The New York Times neşirine beren interwýusynda filmiň ideýasynyň täze «Awatar» filminiň üstünde işleýän wagty dörändigini aýtdy.
Filmiň surata düşüriliş işleri sahnada ýerleşdirilen 17 sany 3D-kamera arkaly alyp barlypdyr. Onuň dowamynda jemi dört sany konsert wideoýazga geçirildi.
Filmde diňe bir konsert çykyşlary däl, eýsem sahna arkasyndaky pursatlar, post-prodakşn materiallary, Billi Aýlişden alnan interwýular we onuň janköýerleri bilen gatnaşygy hem öz ýerini tutýar.
Maglumatlara görä, dünýä prokatynyň ilkinji günlerinde bu film takmynan 20 million dollar ýygnamagy başardy.
Soňky ýyllarda kino industriýasynyň konsert filmlerine bolan gyzyklanmasy ep-esli artdy. Mundan ozal Teýlor Swift, Harri Staýlz, Jeýms Teýlor we «The Cure» topary ýaly meşhurlaryň gatnaşmagynda hem şuňa meňzeş taslamalar ekranlara çykypdy.
