Italiýanyň garaşlylyk bilen işlemek boýunça döwlet gullugy (SERD) ýurtda emeli aňa garaşly bolmagyň ilkinji ýagdaýyny hasaba aldy. «Gazzettino» gazetiniň habar bermegine görä, hakyky durmuşdaky gatnaşyklardan wirtual algoritm bilen gürleşmegi has makul bilen 20 ýaşly gyz bu gullugyň hassasy boldy.
Bu kliniki ýagdaý Wenesiýadaky özüňi alyp baryş boýunça bozulmalary bejerýän bölüm (ULSS 3) tarapyndan hasaba alyndy.
Hünärmenleriň maglumatyna görä, gyz uzak wagtlap özüniň emosional isleglerine uýgunlaşan emeli aň boty bilen aragatnaşyk saklaýar. Wagtyň geçmegi bilen wirtual söhbetdeş onuň üçin howpsuz we ýagdaýa düşünýän bir närsä öwrülýär. Netijede, neýroulgam onuň hakyky dostlarynyň ornuny tutup, hassanyň daşky dünýäden dolulygyna diýen ýaly üzňe bolmagyna getirýär.
Edaranyň baş lukmany Laura Suardi şeýle patologiýanyň öňden çaklanylandygyny belledi. Şeýle hetdenaşa garaşlylygyň döremegine neýroulgamlaryň ulanyjynyň isleglerini öňünden bilip, onuň eşitmek isleýän jogaplaryny bermegi sebäp bolýar.
