Aktrisa K’Orianka Kilçer «Awatar» franşizasynyň awtory Jeýms Kamerony kazyýete berip, režissýoryň Neýtir atly gahrymanynda öz daş keşbini bikanun ulanandygyny öňe sürýär.
Kazyýete berlen arzada 2005-nji ýylda «Täze dünýä» («The New World») filmi çykandan soň, Kameronyň ýaş aktrisa bilen gyzyklanyp başlandygy aýdylýar. Resminamada beýan edilişine görä, režissýoryň «Lightstorm Entertainment» kompaniýasynyň topary Kilçeriň ýüzüniň üç ölçegli (3D) nusgalaryny döredipdir we bu materiallary aktrisanyň razylygy bolmazdan ýörite effekt studiýalaryna beripdir.
Aktrisa öz arzasynda «Kameronyň eden işi ylham almak däl-de, ogurlykdyr. Ol Amerikanyň ýerli halkyndan bolan 14 ýaşly gyzyň özboluşly ýüz sypatlaryny alyp, olary önümçilik işinde ulandy we milliardlarça dollar girdeji gazandy. Munuň üçin bolsa ol gyzdan bir gezek hem rugsat soralmady. Bu kino döretmek däl, bu ogurlykdyr» diýip ýazýar.
Kilçer bolup geçen bu ýagdaýyň hem maddy, hem-de ahlak taýdan nädogrydygyny öňe sürýär. Ol režissýoryň öz keşbini gizlin ýol bilen ulanmagyna garaşmandyr. Aktrisa çekilen zyýanyň öweziniň dolunmagyny, işiň köpçülikleýin öwrenilmegini we geljekde şeýle hereketleriň gadagan edilmegini talap edýär.
Jeýms Kameron häzirki wagta çenli bu aýyplamalar barada hiç hili resmi düşündiriş bermedi.
