NASA tarapyndan guralan CHAPEA maksatnamasynyň ikinji tapgyryna gatnaşyjylar, Mars ekspedisiýasynyň şertlerini gaýtalaýan toplumyň içinde doly üzňelikde 200 günden gowrak wagt geçirdiler. Bu ylmy synag jemi 378 gün dowam eder we 2026-njy ýylyň 31-nji oktýabrynda tamamlanar.
Maksatnama dört adam gatnaşýar: serkerde Ross Elder, lukmançylyk ofiseri Ellen Ellis, ylmy işgär Mettýu Montgomeri we bortinženeri Jeýms Spaýser. Olar geçen ýylyň oktýabr aýyndan bäri NASA merkeziniň çägindäki ýaşaýyş modulynda saklanýarlar.
Häzirki wagtda ekipaž «aragatnaşygyň gün tutulmasy» simulýasiýasyndan geçýär. Bu tapgyrda dolandyryş merkezi bilen aragatnaşyk bütinleý kesilýär. Bu ssenariý Marsyň Günüň beýleki tarapynda ýerleşýän we planetalaryň arasyndaky radiosignallaryň wagtlaýyn mümkin bolmaýan ýagdaýyny gaýtalaýar.
Meýdany takmynan 160 inedördül metr bolan toplumyň içinde gatnaşyjylar çäkli serişdeler, aragatnaşygyň gijikdirilmegi we tehniki näsazlyklaryň imitasiýasy şertlerinde ýaşaýarlar. Ekipaž şertli ýagdaýda Marsyň ýüzüne çykýar, ösümlikleri ösdürip ýetişdirýär we ýaşaýyş üçin zerur ulgamlara hyzmat edýär.
CHAPEA (Crew Health and Performance Exploration Analog Mission 2) maksatnamasy uzak wagtlap dowam edýän üzňeligiň adamyň fiziki we psihologik ýagdaýyna ýetirýän täsirini öwrenmäge gönükdirilendir. NASA şular ýaly synaglary Marsa we geljekki Aý bazalaryna amala aşyryljak adamly uçuşlara taýýarlygyň möhüm basgançagy hökmünde kabul edýär.
