Samsung kompaniýasy Hytaýyň materik böleginde ähli hojalyk tehnikalarynyň, şol sanda telewizorlaryň we monitorlaryň satuwyny bes edýändigini resmi taýdan yglan etdi.
Kompaniýanyň Hytaý saýtynda ýerleşdirilen habarnama görä, bu karar bazardaky üýtgeşmeler sebäpli kabul edildi. Aslynda Samsung brendi Xiaomi we TCL ýaly ýerli öndürijiler tarapyndan hödürlenýän arzan bahaly bäsdeşlige döz gelip bilmedi we ýurduň içindäki bölek satuw amallaryny bes etmäge mejbur boldy.
Satuwyň bes edilmegine garamazdan, Samsung Hytaýdan doly gidenok. Kompaniýa eýýäm satyn alnan enjamlar üçin hyzmat ediş borçlaryny ýerli kanunçylyga laýyklykda dowam etdirjekdigini tassyklady. Şeýle-de, kompaniýanyň Hytaýda ýerleşýän we önümleri eksport üçin öndürýän zawodlary öz işini dowam eder.
Ýerli brendleriň Hytaý bazarynda hökmürowanlyk etmegi netijesinde, Samsung-yň ünsüni daşary ýurt bazarlaryna gönükdirmegi paýhasly ädim boldy. Şunlukda, tehnologiýa ägirdiniň Hytaýdaky işi indi diňe serwis hyzmatlary we beýleki ýurtlar üçin önüm öndürmek bilen çäklener.
