BMW-niň Amerikan bölümi ABŞ-nyň bazary üçin täze BMW iX3 50 xDrive elektrokrossoweriniň esasy aýratynlyklaryny mälim etdi. Modeliň iň uly artykmaçlyklarynyň biri - geçip bilýän aralygy boldy. EPA-nyň baha bermegine görä, awtoulag bir gezekki zarýad bilen 700 kilometre çenli ýol geçip bilýär.
Kompaniýanyň bellemegine görä, geçilýän aralyk tekerleriň görnüşine baglydyr. 20 dýuýmlyk tomusky tekerler bilen bu görkeziji 700 kilometre ýetýän bolsa, ähli möwsümlere niýetlenen (all-season) tekerler bilen takmynan 615 kilometr töweregi bolýar. Bu tapawuda garamazdan, BMW özüniň iX3 modelini öz klasynyň liderleriniň biri hasaplaýar we onuň Tesla Model Y ýaly birnäçe bäsdeşlerinden üstün çykýandygyny mälim edýär.
Kompaniýa täze ulagyň bahasyna hem aýratyn üns çekdi. Elektrikli BMW iX3 50 xDrive-yň bahasy 62 850 dollardan başlaýar, emma benzinli BMW X3 M50 xDrive-yň bahasy bolsa 67 850 dollardan başlanýar. Şunlukda, elektrikli görnüş has güýçli hereketlendiriji ulgamy bilen enjamlaşdyryldy — benzinli modeliň 393 at güýjüne garşy elektrikli modelde 463 at güýji bar.
Awtoulagyň ýene bir möhüm aýratynlygy — 400 kWt kuwwatyna çenli örän çalt zarýad beriş ulgamyny goldamagydyr. BMW-niň maglumatlaryna görä, bary-ýogy 10 minut zarýad bermek arkaly geçilýän aralygy takmynan 300 kilometr artdyrmak mümkindir.
ABŞ-da BMW iX3 50 xDrive üçin sargytlar eýýäm kabul edilip başlandy. Awtoulagy öňünden sargyt etmek üçin 1000 dollar möçberinde depozit goýmaly. Sargyt edilen ulaglaryň eýelerine gowşurylyp başlanmagy bolsa sentýabr aýyna meýilleşdirilýär.
