Google kompaniýasy Android Show I/O Edition 2026 tanyşdyrylyşynyň geçiriljekdigini yglan etdi. Ol 12-nji maýda Ýuwaş ummany wagty bilen sagat 10:00-da (Aşgabat wagty bilen 22:00-da) bolar. Bu çärede kompaniýanyň Android platformasynyň geljekki ösüşi barada giňişleýin maglumat bermegine garaşylýar.
Android Show formaty geçen ýyl peýda boldy we ol 19-njy maýda açylmagy meýilleşdirilýän esasy Google I/O 2026 maslahatynyň öňüsyrasynda aýratyn tanyşdyrylyş hökmünde bellenildi. 2025-nji ýylda bu çäräni Android ekoulgamynyň prezidenti Samir Samat alyp barypdy.
Google häzirlikçe garaşylýan täzelikleriň detallaryny aýan etmedi, emma şu ýylyň "Android üçin iň möhüm ýyllaryň biri" boljakdygyny mälim etdi.
Häzirki wagtda kompaniýa iýun aýynda çykarylmagyna garaşylýan Android 17 ulgamynyň üstünde işleýär. Google-yň bu ulgama degişli ozal mälim edilmedik täze funksiýalary hödürlejekdigi çaklanylýar.
Şeýle-de, köpçüligiň ünsi ChromeOS we Android ulgamlaryny birleşdirjekdigi aýdylýan Aluminium OS taslamasyna gönükdi. Mundan ozal Samsung-yň bu ulgamda işlejek arzan, orta we flagman derejeli noutbuklary taýýarlaýandygy habar berlipdi. Google-yň täze platformanyň mümkinçilikleri we onuň emeli aň (Gemini) bilen integrasiýasy barada has giňişleýin durup geçmegi mümkin. Aluminium OS diňe işçi kod ady hasaplanýandygy üçin, ulgamyň resmi adynyň yglan edilmegi hem ähtimal.
Şunlukda, Google eýýäm ikinji ýyl yzly-yzyna Android üçin aýratyn tanyşdyrylyş geçirýär we emeli aň ugrundaky köp sanly täzelikleriň arasynda mobil platformany özbaşdak ugur hökmünde tapawutlandyrýar.
