Türkmenistanyň wekiliýeti Makedoniýanyň paýtagty Skopýe şäherinde geçirilen Demografik durnuklylyk boýunça «Leading Change: People-centered paths to demographic resilience» atly sebit ministrler maslahatyna gatnaşdy. Bu barada Türkmenistanyň Bilim ministrligi habar berýär.
Halkara we sebit hyzmatdaşlygyna bagyşlanan panel sessiýasynda çykyş eden bilim ministriniň orunbasary Azat Ataýew demografik mümkinçilikler penjiresinden peýdalanmagyň usullaryny hödürledi. Çykyşda adam maýasyny ösdürmek, bilimiň hilini ýokarlandyrmak, zähmet bazarynyň isleglerini çaklamak we ykdysadyýet üçin hünärmenleri taýýarlamak meselelerine deglip geçildi.
Demografik ýagdaýlaryň ykdysady ösüş, ýaşlaryň iş bilen üpjünçiligi we zähmet öndürijiligi bilen gönüden-göni baglanyşyklydygy bellenildi. Şunuň bilen baglylykda, demografik mümkinçiliklere ýokary goşulan gymmatlyga esaslanýan ykdysadyýeti kemala getirmek üçin strategik çeşme hökmünde garalýar.
Maslahata gatnaşyjylara ykdysady we maýa goýum ileri tutulýan ugurlaryny bilim maksatnamalaryna geçirmegi göz öňünde tutýan model tanyşdyryldy. Ýurduň içinde we daşary ýurtlarda bilim alýan ýaşlaryň başarnyklaryny seljermegiň esasynda zähmet bazary üçin hünärli işgärleri taýýarlamagyň meýilleşdirilýändigi bellenildi. Şeýle hem ykdysadyýetiň 11 pudagyny we 156 sany täze hünäri öz içine alýan «Geljegiň hünärleriniň atlasy» hödürlendi.
Mundan başga-da, BMG-niň Ösüş Maksatnamasy (BMGÖM) bilen bilelikde 2026–2027-nji ýyllar üçin «Adam maýasyny strategik meýilleşdirmegiň milli ulgamyny» taýýarlamak meýilnamalary barada habar berildi. Bu taslama emeli aňa esaslanýan sanly platformany we hünärlere bolan islegi çaklamagyň analitik modelini döretmegi göz öňünde tutýar. Şeýle hem demografik çaklamalar we bilim ulgamyny ösdürmek ugrunda BMG-niň Ilat gaznasy (UNFPA) bilen hyzmatdaşlyk edilýändigi bellenildi.
