Türkmenistanyň Magtymguly adyndaky milli sazly drama teatrynda Beýik Watançylyk urşunda gazanylan Ýeňiş güni mynasybetli ýurduň ýokary okuw mekdepleriniň talyp ýigitleriniň arasynda geçirilen «Berkarar döwletiň täze eýýamynyň bagtyýar gerçekleri» atly döredijilik bäsleşiginiň jemleýji tapgyry boldy.
Türkmenistanyň Bilim ministrligi hem-de Ýaşlar guramasynyň Merkezi geňeşi tarapyndan guralan bu çärä deslapky tapgyrlarda öz zehini we ukyp-başarnyklary bilen saýlanan 27 talyp gatnaşdy.
Bäsleşigiň şertlerine görä, talyp ýigitler aýdym-sazlaryň, şowhunly tanslaryň üsti bilen öz hünärlerini taryplamakda, häzirki zaman tehnologiýalaryny ulanmakda hem-de milli edim-gylymlary görkezmekde bäsleşdi. Çykyşlarda türkmen ýigidine mahsus bolan edermenlik, mertlik we halallyk ýaly asylly häsiýetler goşgularyň, monologlaryň hem-de täsirli sahnalaryň üsti bilen beýan edildi. Şeýle-de, talyp ýigitler jemleýji tapgyrda özleriniň wäşilik ukyplaryny görkezdi.
Eminler toparynyň netijelerine görä, bäsleşigiň baýrakly orunlary şeýle paýlandy:
- Baş baýrak: Muhammetmyrat Atamyradow – Magtymguly adyndaky Türkmen döwlet uniwersiteti;
- 1-nji orun: Akmuhammet Açylow – S.A.Nyýazow adyndaky Türkmen oba hojalyk uniwersiteti;
- 2-nji orun: Maksat Işangulyýew – Türkmen döwlet ykdysadyýet we dolandyryş instituty; Abdulwaht Abdyrahymow – Türkmenistanyň Döwlet energetika instituty;
- 3-nji orun: Japarberdi Japarow – Aba Annaýew adyndaky Halkara atçylyk akademiýasy; Mämmet Toýryýew – Ýagşygeldi Kakaýew adyndaky Halkara nebit we gaz uniwersiteti; Mekan Atamyradow – Döwletmämmet Azady adyndaky Türkmen milli dünýä dilleri instituty.
Şeýle hem bäsleşige gatnaşan beýleki talyplar «Edermen ýigit», «Ylhamly ýigit», «Şahandaz ýigit» ýaly dürli ugurlar boýunça ýörite sylaglara mynasyp boldy. Ýeňijilere we işjeň gatnaşyjylara Hormat hatlary hem-de ýadygärlik sowgatlary dabaraly ýagdaýda gowşuryldy.
