Google Chrome brauzeri ulanyjylara habar bermezden ýa-da olardan rugsat soramazdan, takmynan 4 GB ululygyndaky Gemini Nano atly emeli aň modelini kompýuterlere gurnap başlady.
ThatPrivacyGuy resursynyň maglumatyna görä, bu funksiýadan ýüz öwürmegem mümkin däl, eger siz degişli faýllary öçürseňiz hem, ulgam olary awtomat usulda täzeden ýükläp alýar. «Weights.bin» diýlip atlandyrylýan bu faýl brauzeriň içindäki emeli aň funksiýalarynyň işlemegi üçin niýetlenendir. Bu ýagdaý Windows we macOS ulanyjylarynyň arasynda giňden ýaýrady. Geçirilen synaglar täze gurlan brauzeriň hiç hili rugsatsyz 15 minudyň içinde bu uly göwrümli modeli ýükläp alýandygyny görkezdi.
Bu funksiýany öçürmek we faýllaryň gaýtadan ýüklenmeginiň öňüni almak diňe şu usullar bilen mümkin:
Brauzeriň salgy ýazylýan ýerine chrome://flags ýazyp, Enter düwmesine basyň.
Gözleg meýdançasyndan «Enables optimization guide on device» sazlamasyny tapyp, ony «Disabled» (öçürilen) ýagdaýyna geçiriň.
Şonuň ýaly-da, «Prompt API for Gemini Nano» sazlamasyny hem öçüriň.
Kompýuteriňizdäki «OptGuideOnDeviceModel» atly bukany tapyp öçüriň (Windows-da bu AppData bukjasynyň içinde, macOS-da bolsa Application Support bukjasynyň içinde ýerleşýär).
Barlagyň awtory Google-yň bu ädiminiň Ýewropa Bileleşiginiň programma üpjünçiliginiň aýdyňlygy baradaky kanunlaryna ters gelip biljekdigini belleýär. Sebäbi kadalara laýyklykda, ulanyjynyň razylygy bolmazdan goşmaça programmalary gurnamak gadagandyr. Mundan başga-da, Chrome-yň milliardlarça ulanyjysynyň bardygyny hasaba alanyňda, şeýle agyr faýllaryň mejbury ýükledilmegi internet ulgamyna uly agram salýar we daşky gurşawa zyýanly gazlaryň bölünip çykmagyny artdyrýar.
