2020-nji ýylda aradan çykan Samsung korporasiýasynyň ýolbaşçysy Li Gon Hiniň maşgalasy Günorta Koreýa üçin rekord mukdar bolan 12 trillion wona (8 milliard dollar) möçberindäki miras salgydyny dolulygyna töläp gutardy. Bu barada «The Korea Herald» neşiri habar berýär.
Ýurduň iň iri tehnologiýa korporasiýasyny dolandyrýan maşgala bäş ýylyň dowamynda tölegleri alty tapgyrda amala aşyrdy. Salgydy tölemek üçin kompaniýanyň häzirki ýolbaşçysy Li Çže Ýonuň ejesi Hon Ra Hi Samsung-da özüne degişli paýnamalaryň bir bölegini satdy. Liniň maşgalasy bolsa salgyt ýüküni azaltmak üçin lukmançylyk edaralaryna ýüzlerçe million dollar haýyr-sahawat etdi we öz kolleksiýasyndan 23 müňden gowrak sungat eserini döwletiň haýryna berdi.
Emeli aň üçin ýat mikroshemalaryna bolan islegiň artmagy netijesinde kompaniýanyň bazar bahasynyň ep-esli ýokarlanmagy salgyt ýüküni esasy aktiwleriň uly satuwyny amala aşyrmazdan tölemäge mümkinçilik berdi.
Bellenilişi ýaly, Li Gon Hi aradan çykan wagty Günorta Koreýanyň iň baý adamydy we onuň baýlygy 23 trillion wona diýlip hasaplanýardy. Bu şol wagtky nyrh bilen 21 milliard dollara deň. Ýurduň kanunlaryna görä, şeýle uly miras üçin salgyt, takmynan, 60%-e barabar.
Tölenen salgyt mukdary 2024-nji ýylda ýurt boýunça ýygnalan ähli miras salgytlarynyň, takmynan, ýarysyna deň boldy.
