BMW awtomobil dizaýnynyň çäginden çykyp, indi awiasiýa pudagynda lýuks ülňülerini ornaşdyrmaga girişýär: kompaniýanyň BMW Designworks bölümi Lufthansa Technik bilen bilelikde «The BOW» konseptini – uçar interýerini görkezdi.
Bu taslama diňe birje tüçjar baý müşderi üçin däl-de, eýsem uçuş wagtynda rahatlyga, özbaşdaklyga we işlemäge mümkinçilik gözleýän ýolagçylar toparyna niýetlenendir.
Taslama adaty dar göwrümli laýnerleri — mysal üçin, Airbus A321 ýa-da Boeing 737 uçarlaryny ulanmagy, ýöne olaryň salonyny dolulygyna üýtgetmegi göz öňünde tutýar. Adaty 185–220 ornuň ýerine uçaryň içinde diňe 28 ýolagçyny ýerleşdirmek meýilleşdirilýär. Şonuň netijesinde uçar uçup barýan kaşaň giňişlige öwrülýär: onuň öň böleginde bar, uly dynç alyş zolagy we esasy ýolagçy hem-de myhman üçin niýetlenen 14 sany aýry-aýry «studiýa» ýerleşýär.
BMW we Lufthansa Technik kompaniýalarynyň pikiriçe, şeýle format korporatiw saparlar, sport toparlary, sazandalar we beýleki toparlaýyn syýahat edýänler üçin laýyk gelýär. Interýer uçaryň öňünden tä yzyna çenli bitewi bir zolak hökmünde gurnalan bolup, bu salonyň adaty biznes-jetlerden has giň we açyk bolmagyny üpjün edýär.
Dizaýn BMW-niň özboluşly usulynda ýerine ýetirildi: ýumşak stil, arassa çyzyklar, asuda ýagtylyk gurşawy we ýokary hilli materiallar ulanyldy. Tehnologiýalar bolsa görünmez ýaly ýagdaýda gurnaldy — howany dolandyryş, yşyklandyryş we multimedia ulgamlary tekiz üstlerde gizlenen, şonuň üçin salon tehnika bilen doldurylan ýaly görünmeýär.
