Pirelli kompaniýasy Şwesiýanyň «Univrses» tehnologiýa firmasynyň 30% paýyny satyn alandygyny yglan etdi. Bu şertnama kompaniýa özüniň «Cyber Tyre» platformasyna kompýuter görüşi we emeli aň tehnologiýalaryny ornaşdyrmaga mümkinçilik berer.
Bu hyzmatdaşlyk eýýäm tekerleriň içine ýerleşdirilen datçikleri ulanýan sanly ulgamyň mümkinçiliklerini wizual maglumatlar we olaryň intellektual düşündirişi bilen giňeltmäge ýol açar.
Cyber Tyre ulgamy awtoulagyň bort elektronikasyna daşky gurşawyň we ýoluň ýagdaýy barada maglumatlary hakyky wagt tertibinde geçirýär. «Univrses» firmasynyň işläp düzmeleri arkaly ulgam awtoulag kameralaryndan gelýän maglumatlary ulanyp, ýoldaky ýagdaýy has takyk seljerip biler.
Awtoulaglar tarapyndan ýygnalan maglumatlar ýerli ýol gulluklaryna ýoluň zaýalanan ýerlerine çalt baha bermäge we ulag akymlaryny netijeli dolandyrmaga kömek eder.
Häzirki wagtda bu tehnologiýanyň awtoulagy dolandyrmaga nähili täsir etjekdigi barada jikme-jik maglumat berilmese-de, esasy üns ýol üstüniň monitoringine gönükdirilýär. Bu täzelik adaty tekerleri şäheriň sanly eko ulgamynyň möhüm bölegine öwürýär.
Mundan ozal Pirelli-niň «kibertekerleriniň» «Aston Martin» superkarlaryna gurnalyp başlanjakdygy habar berlipdi. Wizual sensorlar we emeli aň arkaly maglumat ýygnamak kanallarynyň giňelmegi sürüş prosesini has akgynly edip, ýol howpsuzlygyny ep-esli ýokarlandyrmalydyr.
