Hytaýyň Ýunnan prowinsiýasynyň Moszýan-Hani awtonom uezdinde dünýäniň 20 ýurdundan gelen müňden gowrak ekiztaýlary birleşdirýän «Tropik Raka» atly köpöwüşginli halkara festiwaly başlandy.
Dürli klimat guşaklarynyň birleşýän ýeri bolan Demirgazyk tropik çyzygynyň ugrunda ýerleşýän Moszýan uezdi gadymdan bäri «ekizleriň watany» hökmünde tanalýar. Bu ýerde ekizleriň dünýä inme derejesi ortaça dünýä görkezijilerinden dört esse ýokarydyr. Şu täsin aýratynlyk hem bu künjekde syýahatçylygyň batly depgin bilen ösmegine uly itergi berdi.
Festiwalyň maksatnamasyna «bile doglanlaryň» ýörişi, milli tanslar we açyk asmanyň astynda müňe golaý saçak ýazylyp, milli tagamlaryň hödürlenýän meşhur «uzyn köçe banketi» ýaly çäreler girýär. Daşary ýurtly myhmanlaryň we uly şäherlerden gelen syýahatçylaryň aýtmagyna görä, özboluşly medeniýeti we etnik aýratynlygy bolan kiçi şäherler dynç almak üçin barha gyzykly ýerlere öwrülip barýar.
Şeýle ähmiýetli çäreleriň ösdürilmegi sanlarda hem öz beýanyny tapýar: Moszýana gelýän ýyllyk syýahatçylyk akymy 2021-nji ýyldaky 2 million adamdan 2025-nji ýylda 6,5 million adama çenli ýokarlandy.
Uezdiň Medeniýet we syýahatçylyk müdirýetiniň direktorynyň orunbasary Çen Linçao häkimiýetleriň myhmanlar üçin ýylyň dowamynda festiwaldan parçalary elýeterli etmegi meýilleşdirýändiklerini we şol bir wagtyň özünde infrastruktura we hyzmat ediş hiline aýratyn üns beriljekdigini mälim etdi.
