Google ýakyn aýlarda Android Automotive operasion ulgamy bilen işleýän awtoulaglarda Google Assistant sesli kömekçisini Gemini emeli aňy bilen çalşyrmagy meýilleşdirýär. Bu täzelenme 2020-nji ýyldan bäri çykarylan ozalky modeller üçin hem elýeterli bolar.
Gemini-niň interfeýsi «Gemini-den sora» diýen düwmeli reňkli panel görnüşinde bolar. Kömekçi «Google Kartalaryň» maglumatlaryny ulanyp, säginmek üçin oňaýly ýerleri tapyp biler, şeýle hem awtoduralgalar ýa-da naharhanalaryň menýusy baradaky soraglara jogap berer.
Täze funksiýalaryň arasynda gelýän tekstli hatlaryň gysgaça mazmunyny taýýarlamak we YouTube Music arkaly diňleýjiniň islegine görä aýdym-saz saýlamak ýaly mümkinçilikler hem bar. Şeýle-de ulanyjylar Gemini Live düzümi arkaly ýol ugry hakda sorag-jogap alşyp we gerek bolsa, kömekçiniň sözüni bölüp, has takyk maglumatlary-da alyp bilerler.
Android Automotive bilen integrasiýa awtoulagyň ulgamlaryna berk arabaglanyşygy üpjün eder. Gemini anyk bir awtoulag modeliniň gollanmasyna esaslanyp, maslahatlary we elektromobiliň batareýasynyň derejesini habar berip biler we klimat-kontrol ýaly funksiýalary dolandyrar. Mysal üçin, sesli buýruk arkaly sowuk howada aýnanyň gyzgynlygyny-da işledip bolar.
Bu täzelenmäni girizmek işleri ilki ABŞ-nda başlar. Isleg bildiren ulanyjylar täze ulgama geçmän, öňki Google Assistant-y ulanmagy dowam etdirip hem bilerler.
