Ženewada geçiriljek «Christie’s» auksionynyň maý söwdalarynda dünýäniň iň seýrek reňkli daşlarynyň biri bolan «The Ocean Dream» (Umman arzuwy) göwheri satuwa çykarylar.
Bu göwheriň goýy gök we deňiz ýaşyl reňkli öwüşgini üýtgeşik gözelligi döredýär. Amerika gemologiýa instituty (GIA) tarapyndan 1931-nji ýyldan bäri hasaba alnan iň uly açyk gök-ýaşyl reňkli göwheriň agramy 5,50 karata deňdir.
Üçburçluk görnüşinde ýonulan bu gymmat bahaly daş almazlaryň örän seýrek duş gelýän «Ia» görnüşine degişli bolup, ol 1990-njy ýyllarda Merkezi Afrikada tapylan 11,70 karatlyk almaz kristalyndan alyndy.
«The Ocean Dream» göwheri öň 2003-nji ýylda Waşingtonda geçirilen «Splendor of Diamonds» sergisinde görkezildi we Smitson instituty tarapyndan dünýäniň iň seýrek sekiz göwheriniň sanawyna girizildi.
Göwher 2026-njy ýylyň 13-nji maýynda «Four Seasons Hotel des Bergues» myhmanhanasynda geçiriljek «Magnificent Jewels» atly auksionda satuwa hödürlener. Onuň takmynan bahasy 8,9 milliondan 12,7 million dollara çenli bolar diýlip garaşylýar.
