Apple-niň üstünden AirTag trekerleri arkaly yzarlanandyklaryny aýdýan ulanyjylaryň 30-dan gowragy şikaýat etdi diýip, MacRumors neşiri habar berýär.
Arzaçylar kompaniýanyň bu enjamyň jenaýatçylar tarapyndan peýdalanyp bilinjekdigini belli bolsa-da, ony satuwa çykarmakda aýyplaýarlar. Olaryň pikiriçe, 2021-nji ýylda satuwa çykan AirTag-yň gorag gurallary hyýanatçylykly ulanyşlardan doly derejede goramaga ukypsyzdyr.
Maglumatlara görä, 2021-nji ýylyň aprelinden 2024-nji ýylyň apreline çenli kompaniýa yzarlanmak bilen bagly 40 müňden gowrak şikaýat gelip gowşupdyr.
AirTag enjamlary «Find My» toruny ulanyp, ýakyndaky beýleki Apple enjamlary arkaly öz ýerleşýän ýerini eýesine bildirýär. Kazyýetiň maglumatlarynda bu elýeterliligiň käbir ýagdaýlarda zorluga çenli alyp barandygy-da agzalýar.
Apple näbelli enjamlar barada habar beriş ulgamyny girizse-de, duýduryşlaryň 4 sagatdan 8 sagada çenli (öňler 72 sagada çenli) gijikme bilen gelýändigi üçin arzaçylar ondan peýdalanyp bilmändirler.
AirTag-yň sesli duýdurşyny aýrybam bolýar. Hatda internet dükanlarynda enjamyň ses çykaryjy dinamigi aýrylan, ýörite üýtgedilen sessiz görnüşleri hem satylýar.
Şikaýatçylaryň her biri öz başyndan geçiren wakasyny kazyýetdäki maglumatlara goşdy. Olar Apple-dan çekilen zyýanyň öweziniň dolunmagyny, jerime tölegleriniň tölenmegini we beýleki bikanun tejribeleriň bes edilmegini talap edýärler.
