Samsung smartfonlaryny bejertmek, hatda resmi ätiýaçlandyryş bar bolan ýagdaýynda-da, iPhone-y bejerdeniňden ortaça 60% gymmada düşýär. Bu barada Insuranceopedia tarapyndan geçirilen gözlegde aýdylýar.
Hasabatyň maglumatlaryna görä, Samsung Care+ meýilnamasyny resmileşdiren Samsung ulanyjylary abatlaýyş işleri üçin 100 dollardan 120 dollara çenli töleýär. AppleCare+ ýazylyşygy bolan iPhone eýeleri bolsa ortaça 75 dollar töweregi çykdajy edýär.
Bu tapawut nyrhlaryň emele geliş ulgamy bilen baglanyşyklydyr. Apple kompaniýasynda kesgitlenen nyrh ulgamy hereket edýär: esasy hyzmatlaryň bahasy öňünden mälim. Samsung-da bolsa baha enjamyň modeline, ýeten zeperiň görnüşine we çylşyrymlylygyna baglydyr, şonuň üçin hem jemleýji baha ep-esli üýtgäp bilýär.
Enjamlaryň hem özboluşly aýratynlyklary goşmaça faktor hökmünde galýar. Samsung-yň hatarynda çylşyrymly modeller, mysal üçin, Galaxy Z Fold seriýasynyň eplenýän smartfonlary bar. Olary bejertmek gymmat bahaly şaýlary we ýöriteleşdirilen enjamlary talap edýär. Apple-de häzirlikçe eplenýän modeller ýok, bu bolsa hyzmat edişiň ortaça bahasynyň has pes bolmagyna uly täsir edýär.
Gözlegiň awtorlarynyň bellemegine görä, bu maglumatlar ortaça görkezijilerdir. Abatlaýyş işleriniň gutarnykly bahasy sebite, hyzmat merkezleriniň elýeterliligine we original ätiýaçlyk şaýlarynyň üpjünçiligine baglylykda üýtgäp biler. Emma umumy ýörelge üýtgemeýär: enjam näçe çylşyrymly bolsa, ony bejertmek hem şonça gymmat düşýär.
