Bu köplere tanyş ýagdaý: mekdepde käbir okuwçylar yzygiderli ýokary baha alýarlar, beýlekileri bolsa kynlyk bilen ortaça derejä ýetmek üçin göreşýärler.
Ýyllar geçensoň, köplenç bar zat tersine üýtgeýär - öň ortaça okan ýa-da hatda “ikilikçi” okuwçylar öz hususy işlerini açýarlar, ýolbaşçy wezipeleri eýeleýärler ýa-da durmuşda öz orunlaryny tapmagyň üýtgeşik usullaryny tapýarlar. Barlagçylar munuň tötänlik däl-de, kanunalaýyklykdygyna ynanýarlar.
Anyklanyp oturylsa, munuň sebäbi diňe bir aň-paýhas bilen bagly bolman, eýsem pikirlenişdäki we özüňi alyp baryşdaky tapawutlarynda bolup çykýar. Mekdep ulgamy öz tebigaty boýunça düzgünleri berjaý edýänleri, maglumatlary ýatda saklap bilýänleri we tabşyryklary takyk ýerine ýetirýänleri höweslendirýär. Emma synpdan daşarda bu häsiýetler möhüm bolmagyny bes edýär.
Mekdepde ýaramaz okanlar, köplenç, ýaşlygyndan bellenen düzgünlere şübheli garap başlaýarlar. Olar agzalan düzgünleri gutarnykly hasaplamaýarlar, öwrümli ýollary gözleýärler we alternatiw çözgütleri öwrenýärler. Wagtyň geçmegi bilen, bu telekeçilik pikirine - beýlekileriň çäklendirmeleri görýän ýerinde mümkinçilikleri görmek ukybyna öwrülip biler.
Başga bir tarapy hem bar, ýagny tejribe. Käbirleri ünsüni nazaryýete jemleýän mahaly, beýlekileri hakyky durmuş bilen has ir tanyşýarlar: olar işläp başlaýarlar, taslamalary durmuşa geçirmäge synanyp görýärler, adamlar bilen gatnaşykda bolmagy öwrenýärler we karar kabul edýärler. Bu tejribe olara okuw kitaplaryndan daşarda prosesleriň nähili gurlandygyna düşünmäge kömek edýär.
Şowsuzlyga çydamlylyk hem şeýle möhümdir. Tankyda we pes bahalara öwrenişen adamlar köplenç şowsuzlyklara aňsatlyk bilen döz gelýärler. Olar çalt uýgunlaşýarlar we täzeden başlamakdan gorkmaýarlar. Ýalňyşlyklaryň gutulgysyz ýagdaýynda, goý, ol biznes bolsun ýa-da karýera - bu uly artykmaçlyga öwrülýär.
Mekdepde bir hili häsiýetlere, durmuşda bolsa düýbünden başga häsiýetlere ähmiýet berilýändigi mälim bolýar.
Çeýelik, başlangyç, töwekgelçilik etmäge we näbelliligiň içinde hereket etmäge taýyn bolmak, köplenç, oňat bahalardan has möhümdir. Şonuň üçin pes akademiki görkezijiler geljegi kesgitlemeýär - käwagt ol diňe üstünlige barýan başga, adaty bolmadyk ýoly görkezýär.
