Finlýandiýanyň Aalto uniwersitetiniň inženerleri ulanyjylara wirtual saunada dynç almaga mümkinçilik berýän ulgam işläp düzdüler. Ulgam VR äýneginden hem-de yssylyk we sowuklyk duýgusyny berýän Peltier termoelektrik elementli kurtkadan ybarat diýip, N+1 habar berýär.
Wirtual gurşaw agaçdan gurlan, peçli we suwly bedreli däp bolan fin saunasyny täzeden döredýär. Ulanyjy hereket datçigi bolan hakyky agaç susagy selinde saklaýar: wirtual suwy alyp, daşlara serpseň, ulgamda bug emele gelýär we ses çykýar.
Bu pursatda kurtkanyň ýeňlerindäki elementler yzly-yzyna 45 gradusa çenli gyzyp başlaýar we bu ellerden gyzgyn bug geçýän ýaly duýgyny döredýär.
Edil şonuň ýaly sowadyjy täsir hem üpjün edilen. Eger üstüňden bir bedre suwy "guýsaň", elementleriň temperaturasy 25 gradusa çenli düşýär we gurlan wibrasiýa motorlary suwuň akymynyň duýgusyny güýçlendirýär.
Işläp düzüjileriň sözlerine görä, termal we mehaniki stimulýasiýalaryň utgaşmasy duýgyny hasam hakyky görkezýär. Geljekde bu tehnologiýany diňe bir güýmenjede däl, eýsem ýangyn söndürijilere tälim bermekde, wirtual syýahatçylykda we uzak aralykdaky gatnaşyklar wagtynda termal duýgulary geçirmekde ulanmak meýilleşdirýärler.
