Ýewropa Bileleşiginde geçiş döwri tamamlandy we USB-C porty kuwwaty 100 Wt çenli bolan täze ykjam kompýuterlere (noutbuklar) zarýad bermek üçin hökmany standarta öwrüldi. Bu talap Radiogurluşlar baradaky direktiwanyň täzelenen kadalarynda berkidildi.
Täze düzgünler, hakykat ýüzünde, ÝB-niň bazarynda diňe «tegelek» ştekerler ýa-da markanyň özüne mahsus bolan beýleki zarýad beriş portlary arkaly zarýad alýan noutbuklaryň çykarylmagyny gadagan edýär. USB-C standartyny ulanmaýan öndürijiler şeýle enjamlary Bileleşigiň ýurtlarynda satmak mümkinçiligini ýitirýär.
Kuwwaty 100 Wt-den köp bolan güýçli oýun noutbuklary we iş stansiýalary üçin kadadan çykmalara ýol berilýär. Olar öz iýmitlendiriş bloklaryny saklap galyp biler, ýöne şol bir wagtyň özünde standart režimde zarýad bermek mümkinçiligi bilen USB-C portunyň hem bolmagy hökmanydyr.
Şeýle hem sarp edijileriň noutbugy toplumynda zarýad beriji bloksuz satyn almaga bolan hukugy aýratyn berkidildi. Ýewropa Parlamentiniň hasaplamalaryna görä, bu çäre ÝB-niň ýaşaýjylaryna her ýyl, takmynan, 250 million ýewro tygşytlamaga mümkinçilik berer.
Bu çözgüt ekologiýa maksatlary bilen düşündirilýär: Ýewropa Komissiýasy bu arkaly her ýyl elektron galyndylaryň, takmynan, 11 müň tonna azalmagyna garaşýar.
Kanun eýýäm öndürilen ýa-da satuwda bar bolan enjamlara degişli bolman, diňe täze çykarylýan modellere degişlidir.
