Google kompaniýasy Gemini emeli aň goşundysyna mahabat girizmek mümkinçiligine seredýär. Bu barada kompaniýanyň işewürligi ösdürmek boýunça direktory Filipp Şindler maýadarlaryň öňünde eden çykyşynda mälim etdi.
Onuň aýtmagyna görä, kompaniýa gözleg ulgamynyň emeli aň režimine mahabat görnüşlerini goşmagy öwrenýär we bu modeli Gemini goşundysyna hem geçirmegi göz öňünde tutýar. Şol bir wagtyň özünde, Google bu işde howlukmaýandygyny we mahabatyň dogry ornaşdyrylan ýagdaýynda «peýdaly täjirçilik maglumatyna» öwrülip biljekdigini belleýär.
Häzirki wagtda mahabat elementleri eýýäm AI Overviews ulgamynda ulanylýar we Google Search-iň emeli aň režiminde synagdan geçirilýär, emma Gemini-niň özbaşdak görnüşinde (şol sanda mugt wersiýasynda-da) mahabat ýokdur.
Mundan ozal OpenAI kompaniýasy ChatGPT-niň käbir ulanyjylary üçin hemaýatkärlik kontenti hökmünde mahabat integrasiýalaryny girizipdi. Şol bir wagtyň özünde, Anthropic kompaniýasy Claude goşundysyna hiç wagt mahabat goşmazlyga söz berdi. Hatda soňky Superboul wagtynda kompaniýa OpenAI-yň öz çat-botunda mahabat ulanýandygyny ýaňsylady.
«PCWorld» neşiriniň baha bermegine görä, bazaryň täze monetizasiýa usullaryna geçýän we emeli aň önümleriniň gymmatlaýan döwründe çat-botlarda mahabatyň bolmagy trende öwrülip biler.
