Motorola kompaniýasy Swarovski kristallary bilen bezelen «Brilliant Collection» atly premium enjamlar toplumyny resmi taýdan hödürledi. Bu ýörite topluma Swarovski kristallary bilen bezelen «Motorola Signature» flagman smartfony we «Moto Buds 2 Plus» simsiz gulaklyklary girýär.
Täze enjamlaryň esasy aýratynlygy – gymmat bahaly daşlaryň el bilen goýulmagy we Pantone tarapyndan işlenip düzülen «Violet Indigo» reňkiniň utgaşdyrylmagydyr.
Öndürijiniň mälim etmegine görä, «Motorola Signature» smartfonunyň yzky paneli ýüpek matasyna meňzeş tekstura eýe bolup, ol 20 sany ametist reňkli Swarovski kristaly bilen bezelendir. Öz gezeginde, her bir «Moto Buds 2 Plus» gulaklygyna 12 sany, olaryň zarýad beriş gutusyna bolsa ýene 41 sany bezeg kristaly goýuldy.
Täze toplumy ýakyn hepdelerde Ýewropada, Ýakyn Gündogarda, Afrikada, Latyn Amerikasynda we Aziýa-Ýuwaş umman sebitinde satuwa çykarmak meýilleşdirilýär.
«Motorola Signature» (16/512 GB) modeliniň bahasy 1400 ýewro, «Moto Buds 2 Plus» gulaklygynyň bahasy bolsa 150 ýewro bolar.
Ýatladyp geçsek, bu smartfonuň şu ýylyň ýanwar aýynda çykan 6,8 dýuýmlyk AMOLED ekrana, Snapdragon 8 Gen 5 prosessoryna we 50 megapiksellik üçli kamera eýe bolan adaty görnüşine 820 ýewro baha kesilipdi.
