Filippinleriň Palawan welaýatyndaky Entalula dynç alyş kenary «World’s 50 Best Beaches 2026» reýtinginde birinji orny eýeledi. Iň arassa we çola kenarlaryň sanawyny «Time Out» neşiri taýýarlady.
Ikinji orunda Gresiýanyň Kefaloniýa adasyndaky Fteri-Biç, üçünji orunda bolsa Awstraliýanyň Uorton-Biç kenary ýerleşdi. Olaryň yzyndan Madagaskardaky Nusi-Iranýa we Fijiniň Womo adasyndaky Ist-Biç kenarlary gelýär.
Reýting sekiz ölçeg esasynda düzülýär. Olaryň arasynda landşaftynyň özboluşlylygy, ýabany tebigatyň bolmagy, daşky gurşawyň eldegrilmesizligi, «ses landşafty» (adamlaryň döredýän goh-galmagalynyň ýoklugy), suwa girmegiň aňsatlygy, suwuň asudalygy, adamlaryň köp bolmazlygy we howa şertleriniň gowy bolmak ähtimallygy bar.
Sanawy düzen bilermenler esasy faktorlar hökmünde dynç alyş kenarynyň çola ýerde ýerleşmegini we ekoulgamynyň abat bolmagyny belleýär. Kenarlaryň köpüsinde ýa syýahatçylyk infrastrukturasy ýok, ýa-da olara diňe suw ýoly arkaly baryp bolýar.
Birinji ýerdäki Entalula kenary hek daşly gaýalar we palma agaçlary bilen ak çägelikden ybarat bolup, ol ýere diňe gaýykly baryp bolýar. Fteri-Biç suwunyň durulygy, Uorton-Biç bolsa delfinlere tomaşa etmek we sýorfing bilen meşgullanmak üçin amatly şertleri bilen bellidir.
Reýtinge Italiýa, Ispaniýa, Portugaliýa, Irlandiýa, ABŞ, BAE, Tailand, Indoneziýa, Seýşel Adalary, Braziliýa we Günorta Afrika Respublikasy ýaly 30-dan gowrak ýurduň dynç alyş kenarlary girdi.
