Hytaýly taýkonawtlar ilkinji gezek «Týangun» orbital stansiýasynda doly bir ýyly geçirerler. Bu barada ýurduň kosmos maksatnamasynyň wekilleri ilkinji gezek resmi taýdan habar berdiler.
Bu beýanat, 2021-nji ýylda «Long March 5B» raketasynyň kömegi bilen orbita çykarylan «Týanhe» esasy modulynyň durnukly işläp başlamagynyň ýubileýine gabatlanyp berildi. Bu modul stansiýanyň merkezi bölegine öwrülip, ol dolandyryş, kosmos gämileriniň birikmegi hem-de ekipažyň ýaşaýyş we ylmy işleri üçin şertleri döretmek wezipelerini ýerine ýetirýär.
«Týanhe» stansiýanyň esasy birikmesi hyzmatyny bitirýär. Onuň içinde ýaşaýyş jaýlary, lukmançylyk gözegçilik zolaklary, iş meýdançalary we fiziki maşklar üçin niýetlenen ýörite ýerler bar. Bu bolsa kosmonawtlara orbitada uzak wagtlap ýaşamaga, işlemäge we uzak möhletli missiýalar üçin möhüm bolan fiziki taýýarlygyny saklamaga mümkinçilik berýär.
Hytaý dilinden terjime edilende «Arş köşgi» diýmekligi aňladýan «Týangun» stansiýasy, Ýeriň golaýyndaky pes orbitada, 340-dan 450 kilometre çenli belentlikde ýerleşýär we birnäçe moduldan ybaratdyr. 2025-nji ýylyň ahyryna çenli stansiýada 267 sany ylmy we amaly taslama durmuşa geçirildi.
Bu işleriň çäginde orbitada dokuz tapgyr eksperimental nusgalar synagdan geçirildi we 450 terabaýtdan gowrak ylmy maglumat alyndy.
