Lozanna uniwersitetiniň alymlary rak öýjükleriniň ejiz tarapyny salgy berip biljek mehanizmi tapdylar we B7 witamininiň ýetmezçiliginde olaryň käbiriniň ösmek ukybyny ýitirýändigini ýüze çykardylar.
Öýjüklere ösmek we bölünmek üçin iýmit maddalary zerurdyr. Bu ýerde glutamin – beloklaryň we DNK-nyň emele gelmegine gatnaşýan aminokislota aýratyn orny eýeleýär. Köp çişler biotine örän baglydyr. Ýöne muňa garamazdan, olar uýgunlaşyp, ýaşap galmagyň alternatiw ýoly hökmünde özlerine başga iýmit çeşmesini – piruwaty tapýarlar.
Alymlar bu ýerde iňňän möhüm bir zady anykladylar: rak öýjüginiň piruwaty ulanyp bilmegi üçin piruwatkarboksillaza diýen ferment gerek. Bu fermentiň işläp bilmegi üçin bolsa, hökman B7 witamini – biotin zerurdyr. Eger biotin ýetmezçilik etse, bu ferment işini bes edýär we rak öýjügi özüne başga iýmit çeşmesini tapyp bilmän, ösüşini haýalladýar ýa-da doly togtadýar.
Şeýle hem barlaglar FBXW7 geniniň mutasiýa ugran ýagdaýynda öýjükleriň piruwaty ulanmak ukybynyň peselýändigini we olaryň glutamine has garaşly bolup galýandygyny görkezdi. Alymlaryň pikirine görä, bu maglumatlar rak çişleriniň özüni goramak üçin ulanýan şeýle «ätiýaçlyk ýollaryny» ýapyp biler we netijede madda çalşygynyň birnäçe prosesine birbada täsir etjek täze bejergi usullaryny işläp düzmäge uly kömek eder.
