«South China Morning Post» (SCMP) neşiriniň Rhodium Group ylmy-gözleg kompaniýasynyň maglumatlaryna salgylanyp berýän habaryna görä, Hytaýyň ilaty ýakyn on ýylyň içinde 60 million adam azalyp biler. Bu görkeziji tutuş Fransiýanyň ilat sanyna deň bolup, ýurduň ykdysady ösüşine, sarp ediş ukybyna we zähmet öndürijiligine düýpli täsir eder diýlip çaklanylýar.
Gazetiň belleýşi ýaly, demografik pese gaçyş eýýäm ykdysadyýete täsirini ýetirýär. Ilatyň garramagy we maşgalalaryň sanynyň azalmagy garrylara ideg etmek ulgamyna düşýän agramy artdyrýar. Geçen ýyl sosial üpjünçilik gaznalaryna berlen döwlet kömegi 2,9 trillion ýuana (425 milliard dollar) ýetip, ähli býujet çykdajylarynyň 10,1%-ini düzdi. Kompaniýa çykdajylaryň artmagyny dowam etdirjekdigini belleýär.
Şeýle-de, analitikler ilat sanynyň azalmagynyň karz bermek amallarynyň gowşamagyna we göterim mukdarlarynyň peselmegine sebäp boljakdygyny çaklaýar. Bu ýagdaý hatda Hytaýyň iň baý kenarýaka welaýatlaryna hem täsirini ýetirip başlady.
Ilatyň azalmagynyň esasy sebäpleriniň biri çaga dogluşynyň peselmegi boldy. 2025-nji ýylda Hytaýda bary-ýogy 7,92 million çaga dünýä indi. Bu rekord derejede iň pes görkeziji bolup, öňki ýyl bilen deňeşdirilende 17% azdyr. Ilat eýýäm yzygiderli dördünji ýyl azalýar. Hünärmenler bu ýagdaýy ýurtda ýaşaýyş bahasynyň artmagy we täze nesliň maşgala gurmak baradaky garaýyşlarynyň üýtgemegi bilen baglanyşdyrýar.
