ABŞ-nyň Alabama uniwersitetiniň alymlary ýurduň gündogar kenaryndaky şäherler üçin suw joşgunynyň bolmak töwekgelçiligine baha berdi we barlaglaryň netijelerini «Science Advances» žurnalynda çap etdi.
Geçirilen ylmy işe görä, Nýu-Ýork we Täze Orlean bu howpa has ýakyn şäherler diýlip ykrar edildi. Hususan-da, Nýu-Ýorkda şäher binalarynyň 47%-ine we 4,4 million töweregi ýaşaýja uly zyýan ýetmek howpy bar.
Bu megapolislerden başga-da, Hýuston, Maýami, Norfolk, Çarlston, Jeksonwill we Mobil şäherleri hem howply zolakda ýerleşýär. Täze Orlean boýunça görkezijiler has-da agyr boldy: bu tebigy hadysadan ilatyň 98%-iniň (takmynan, 375 müň adam) we şäher infrastrukturasynyň 99%-iniň zyýan çekmegi mümkin.
Agzalan ilatly nokatlar üçin howpuň ýokary bolmagy birnäçe sebäpler bilen düşündirilýär: olaryň deňiz derejesinden pesde ýerleşmegi, ilatyň gürlügi, drenaž ulgamlarynyň netijesizligi, gurluşyk aýratynlyklary, ýagyn möçberi we suwa ýakyn ýerleşmek.
Işiň netijeleri boýunça alymlar häkimiýetleri häzirden töwekgelçilikleri azaltmak üçin çäreleri görmäge, şol sanda gatlalary, bentleri we gury ýer depelerini gurmaga çagyrdy.
