"Maýkl” atly terjimehal film ilkinji dynç günlerinde dünýäde 217 million dollar girdeji gazanyp, terjimehal filmleriň arasynda rekord goýdy. Bu barada The Guardian neşiri habar berýär.
Bu jemi girdejiniň 97 million dollary ABŞ bazaryndan gelip gowuşdy, bu film "Köçeleriň sesi" we "Bogem rapsodiýasy" ýaly meşhur filmleriň ilkinji görkezijilerinden iki esse köp boldy. Bellemeli zat, film çykmazyndan bir aý öň seljerijiler onuň ujypsyz 50-60 million dollarlyk girdeji gazanjakdygyny çaklapdylar.
Amerikanyň kassalarynda Maýkl Jekson hakyndaky hekaýat 2026-njy ýylyň iň ýokary girdejisi boýunça ikinji orny eýeledi, diňe 131 million dollar girdeji gazanan "Super Mario: Galaktiki kino" multfilminden yza galdy.
Taslamanyň režissýory Antuan Fukua boldy.
Filmde artistiň The Jackson 5 toparyndaky ilkinji ýyllaryndan başlap, dünýä ýyldyzy derejesine çenli bolan ýoluny beýan edýär. Baş keşbi aýdymçynyň ýegeni Jafar Jekson, onuň ene-atasyny bolsa Kolman Domingo bilen Nia Long janlandyrýar.
Filmiň täjirçilik üstünligine garamazdan, bu baradaky pikirler düýpli bölündi. Rotten Tomatoes-da tankytçylaryň “täze” reýtingi diňe 38% boldy, tomaşaçylaryň ballary bolsa 97%-e ýetdi. Şeýle tapawut Metacritic-de hem hasaba alyndy we Letterboxd-yň ulanyjylary baýopike mümkin bolan 5 ýyldyzdan 3,6 ýyldyz berdiler. Tankytçylar kinorežissýorlary artistiň terjimehalyny öte ýylmamakda we onuň şahsyýetini düýpli açmazlykda günäkärleýärler. Has takygy, aýdymçynyň terjimehalyndaky jedelli temalar soňky wersiýadan doly aýryldy: olar aslynda ssenariýa girizilipdi, ýöne kanuny ylalaşyklar we Jeksonyň maşgalasynyň gatyşmagy sebäpli aýryldy.
Beýleki tarapdan, tomaşaçylar filmi uly joşgun bilen garşyladylar we gös-göni kinoteatrlarda performanslary guradylar. Sosial media Jafaryň daýysyna bir almany ikä bölen ýaly meňzeşdigini işjeň ara alyp maslahatlaşýar we aýdym-sazly sahnalaryň goýluşyny öwýär, emma käbirleri hitleri çenden aşa köp hasaplaýarlar, bu bolsa käte filmi aýdym-saz wideosyna meňzedýär.
"Maýkl" filminiň önümçiligi Lionsgate, Universal studiýalaryna we aýdymçynyň mirasdüşerlerine 200 million dollara düşdi, bu bolsa ony iň gymmat terjimehal filmleriniň birine öwürdi. Üstünligiň fonunda eýýäm onuň dowamynyň çykmagyna garaşylýar.
