Missuri uniwersitetiniň alymlary towuk ýumurtgalarynyň lukmançylyk zerurlyklary üçin dermanlyk beloklaryny durnukly öndürmegine mümkinçilik berýän usuly işläp düzdüler.
Poultry Science žurnalynda çap edilen gözleg, öňler guşlary waksinalary we antitelleri çykarmak üçin ynamly bioreaktorlar hökmünde ulanmaga päsgel beren genleriň durnuksyzlygy ýaly möhüm meseläniň çözgüdini beýan edýär.
Ýumurtgalardan derman almak konsepsiýasy täze däl. Bu usul eýýäm dümewe garşy waksinalary döretmekde ulanylýar. Ýöne pudagy ösdürmek üçin esasy päsgelçilik, gurnalan DNK-nyň «ynamly däldigi» bolupdy. Guşuň bedeniniň wagtyň geçmegi daşyndan girizilen genetiki maglumatlary öçürmegi, ýagny «Epigenetik basyp ýatyrma» diýlip atlandyrylýan hadysanyň ýüze çykmagy bilen, zerur bolan belogyň öndürilmegi indiki nesillerde dowam edip bilmeýärdi.
Kiho Liniň ýolbaşçylygyndaky gözleg topary bu kynçylygy çözmek üçin CRISPR atly häzirki zaman gen redaktirleme tehnologiýasyny ulandylar. Olar derman öndürýän geni towugyň bedeni üçin iň zerur we hemişe hereketdäki bolan gen zolagyna – GAPDH geniniň ýanyna ýerleşdirdiler. Netijede, bu «medisina genleri» indi ömürboýy towugyň bedeninde işjeň ýagdaýda galyp bilýär.
Gipotezany tassyklamak üçin täze gene ýalpyldawuk marker goşuldy. Synaglar öýjükleriň köp bölünmeginden soň hem signalyň ýok bolmandygyny görkezdi. Meňzeş gözleglerde öň gazanylmadyk bu netije genleriň ýapylmandygyny subut edýär. Munuň özi, özgerdilen guşlaryň doly neslini döretmekden öňki möhüm ädimdir.
Usulyň iş ýüzünde üstünlikli tassyklanan ýagdaýynda, towuklar täsirli bioreaktorlara öwrülip bilerler. Şeýle guşuň her bir ýumurtgasy çylşyrymly biomolekulalary öndürmek üçin bellenen beloklary saklar. Kiho Liniň aýtmagyna görä, tehnologiýa peýdaly derman düzümleri bolan ýumurtgalary berýän towuklaryň durnukly baş sanyny döretmäge mümkinçilik berer. Lukmançylykdan başga-da, bu çemeleşme guşlaryň öz immunitetini ýokarlandyrmak, mysal üçin, towuk dümewine duýgurlygyny azaltmak üçin hem ulanylyp bilner.
Täzeligiň önümçiligi has arzan we howpsuz etjekdigi bolsa öz-özünden düşnüklidir.
