Duşanbe şäherinde ýol infrastrukturasyny täzelemek boýunça giň gerimli işler başlandy. Onuň dowamynda Täjigistanyň paýtagtynyň şaýollaryndaky we köçelerindäki ähli köne ýolyşyklar döwrebap «akylly» enjamlar bilen çalşylar. Bu barada «Howar» milli maglumat agentligi Içeri işler ministrliginiň şäher müdirligine salgylanyp habar berýär.
Täze ýolyşyklar ulag akymynyň dykyzlygyny özbaşdak seljerýän we hereket tapgyrlaryny kadalaşdyrýan awtomatlaşdyrylan ulgam bilen baglylykda işleýär.
«Akylly şäher (Smart City)» döwlet unitar kärhanasynyň tehnologiýalarynyň ornaşdyrylmagynyň paýtagtyň esasy ýollaryndaky agramy ep-esli azaltmaga, şeýle-de dyknyşyklaryň we ýol-ulag hadysalarynyň sanyny azaltmaga mümkinçilik bermegine garaşylýar.
Ýolyşyk desgalaryndan başga-da, Duşanbede wideo-gözegçilik ulgamy hem işjeň ösdürilýär: häzirki wagtda 115 sany çatrykda düzgün bozulmalaryny hasaba alýan 315 kamera we ýüzleri tanaýan 43 kamera işleýär.
Şeýle hem maksatnamada tölegli awtoulag duralgalarynyň çägini giňeltmek we «Bozdoşt» meýilnamasynyň çäklerinde şäheriň giriş ýollarynda goşmaça kameralary gurnamak göz öňünde tutulýar. Bu bolsa şäherdäki amallara gözegçiligi täze tehnologik derejä çykarmaga ýardam eder.
