Ferrari markasynyň Luce diýlip atlandyrylan ilkinji doly derejeli elektromobili dünýäde iň gymmat seriýaly elektrokar bolup biler. Onuň deslapky bahasy 550 müň ýewro möçberinde çaklanylýar.
Resmi tanyşdyrylyşyň diňe birnäçe hepdeden soň boljakdygyna garamazdan, Bloomberg agentligi bahanyň eýýäm kesgitlenendigini we onuň diňe 10% töweregi üýtgedilip bilinjekdigini habar berýär. Bu täze model Purosangue krossowerinden 100 müň ýewro gymmat bolup, brendiň iň gurply müşderileriň arasynda özüne çekijiligini saklamak strategiýasyny aýdyň görkezýär.
Luce modeliniň iki hatar oturgyçly we dört ýa-da bäş gapyly grand-turer kuzowynda bolmagyna garaşylýar. Kompaniýa nusgawy nepislik we sport dinamikasyna üns berip, bu modelde krossower aýratynlyklarynyň boljagyny inkär edýär. Tehniki häsiýetnamalary haýran galdyrýar: umumy kuwwaty müň at güýjünden geçýän dört sany elektrik motory awtomobiliň 100 km/sag tizlige bary-ýogy 2,5 sekuntda ýetmegine mümkinçilik berer.
Geljekki täze önümiň salony eýýäm bölekleýin mälim edildi, emma kompaniýa ähli jikme-jiklikleri resmi tanyşdyrylyşa çenli gizlin saklaýar. Bilermenler, çäkli mukdarda çykarylýan giperkarlary hasaba almanyňda, Luce modeliniň ultra-kaşaň seriýaly elektromobiller segmentindäki boşlugy doldurjakdygyny belleýärler.
Modeliň resmi tanyşdyrylyşy şu ýylyň maý aýynda meýilleşdirilýär.
