Instagram, Facebook we WhatsApp sosial ulgamlarynyň eýesi bolan Meta kompaniýasy sekiz müňe golaý işgärini (takmynan, 10%) işden çykarmak meýilnamasyny mälim etdi. «BBC News» neşiriniň belleýşi ýaly, bu çözgüt kompaniýanyň beýleki ugurlara, şol sanda emeli aň tehnologiýalaryna maýa goýmak islegi bilen baglanyşyklydyr.
Şeýle hem Meta ozal işgär almagy meýilleşdiren alty müňe golaý boş iş ornuny ýapar.
Kompaniýanyň işgärlerine iberen hatynda Meta-nyň işgärler boýunça direktory Janel Geýl emeli aňy göni agzamady, ýöne bu işden çykarmalaryň kompaniýa «beýleki maýa goýumlaryň öwezini dolmaga» mümkinçilik berjekdigini belledi diýip, «The Guardian» ýazýar.
2026-njy ýylda Meta emeli aňy ösdürmek üçin 135 milliard dollar sarp etmegi meýilleşdirýär — bu mukdar öňki üç ýylyň jemine deňdir. Ýylyň başyndan bäri Meta eýýäm iki gezek kiçi göwrümli azaltmalary geçirip, iki müň işgärini işden boşatdy.
Munuň bilen bir wagtda, Microsoft kompaniýasy hem köpýyllyk tejribesi bolan işgärlerine öwez tölegleri esasynda öz islegi bilen işden gitmegi teklip etjekdigini habar berdi. «Financial Times-yň» ýazmagyna görä, bu ýerde ýaşy we iş tejribesi umumylykda 70 ýyldan geçýän, takmynan, sekiz müň işgär (umumy işgär sanynyň 7% töweregi) barada gürrüň gidýär. Kompaniýa tarapyndan bu çözgüdiň sebäpleri resmi taýdan düşündirilmedi. Şol bir wagtda «The Guardian» Microsoft-yň emeli aňa, takmynan, 100 milliard dollar sarp etmegi meýilleşdirýändigini ýatladýar.
