Ertir, 25-nji aprelde Aşgabatda innowasion tehnologiýalara gyzyklanma bildirýän ýaşlaryň arasynda «Ýaş inžener — 2026» atly robototehnika we programmirleme bäsleşigi geçiriler.
Türkmenistanyň Senagatçylar we telekeçiler partiýasynyň Aşgabat şäher komiteti, Bilim ministrliginiň Aşgabat şäher Baş bilim müdirligi hem-de Türkmenistanyň Magtymguly adyndaky Ýaşlar guramasynyň Aşgabat şäher geňeşi tarapyndan guralýan bu bäsleşik dört ugur boýunça geçiriler:
- «Akylly önümçilik-hyzmat tehnologiýalary»: Bu taslama-döredijilik bäsleşigine 7–12-nji synp okuwçylary ýekelikde ýa-da iki adamdan ybarat topar bolup, öz innowasion taslamalary bilen gatnaşyp biler.
- «Robototehnika»: 7–12-nji synp okuwçylary üçin niýetlenen bu ugurda robotlar 2,5 minutyň dowamynda ýerdäki topjagazlary ýygnap, dürli beýiklikdäki gaplara ýerleşdirmeli. Bu ugurda iň gowy netije görkezen bäş gatnaşyjy First Global Challenge — 2026 robototehnika dünýä çempionatynyň nobatdaky tapgyryna gatnaşmaga hukuk gazanar.
- «Erjeller kodlaýar»: 8-nji synpdan kiçi okuwçylar Scratch programmirleme dilinde taýýarlan oýunlaryny we animasiýalaryny, şeýle-de başga görnüşli programmalaryny hödürläp biler.
- «BattleBots»: Robotlaryň göreşi islendik ýaşdaky raýatlar üçin açykdyr.
Bäsleşigiň çäklerinde sergi hem-de okuw-dil merkezleriniň diwarlyklary guralar. Hususan-da, «Bilesigeliji» (Curioo Kids) okuw merkezi çagalaryň ukyp-başarnyklaryny anyklaýyş ulgamlary we okatmakda ulanylýan döwrebap usullar bilen tanyşdyrar.
Gatnaşyjylar 25-nji aprele doly taýýar ýagdaýda, taslamalary bilen bilelikde, bäsleşik başlamazdan öň gözden geçirilişige gelmelidir. Ýeňijilere guramaçylar tarapyndan gymmat bahaly sowgatlar we Bilim ministrliginiň Hormat hatlary gowşurylar.
Bäsleşik «Ojаr Aziýa» hususy kärhanasynyň binasynda, G. Kulyýew köçesiniň 38-nji jaýy salgysy boýunça geçiriler. Goşmaça maglumatlary almak üçin +99361862766 telefon belgisi arkaly ýüz tutup bilersiňiz.
